> 網誌分享> [日本城🏯]日本城郭觀賞指南（三）天守分類 (建築風格編)

[日本城🏯]日本城郭觀賞指南（三）天守分類 (建築風格編)

2021-08-10

續上集以不同角度介紹天守，包括古蹟現存天守同埋近代落城嘅復原、復興天守，甚至當代建築物，天馬行空嘅模擬天守；今集將繼續以建築風格分享如何欣賞天守之美。

就天守建築而言，本身可以分做四大類：

🏯① 獨立式

最簡單嘅就係獨立式天守。顧名思義，單獨一座，並無任何其他建築物連住。多數會獨立建於天守台之上，並以天守本體直接出入。

由於天守往往係城市中最高建築，所以好容易會被雷打中，引發火災。因此獨立型天守可以減低因天守著火而連帶燒卻其他建築作用。但相對作戰中嘅防禦作用會較低。

當中著名例子為丸岡城、宇和島城。

🏯②複合式

比獨立式進階一級嘅係複合型天守。特點係天守會直接連住一座付櫓，從而增加天守作戰能力。

通常付櫓都會作為天守嘅出入口，同時為天守提供多一個地方作戰，而且增加攻擊手段。除咗喺櫓內向外多咗地方可以設兵或射擊、防守，亦可以引敵向天守進攻，然後喺付櫓內伏擊敵兵，作為天守主樓前嘅最後防線。

現存天守中嘅彥根城、松江城都屬於此類。

🏯③ 連結式

連結式好容易會同複合式同最後介紹嘅連立式混淆。連結式天守通常會以有蓋走廊或者多聞櫓、渡櫓(相對較長，能提供類似城牆作用嘅櫓)連結大天守同小天守或者其它櫓，防禦能再進一級。

通常除咗天守主樓(大天守)外，連結式天守群亦會有另外高於一層嘅櫓，或者以建築規格不同而被稱作小天守，不但作戰能力得以提升，亦可以增加望樓，作副指揮部。當然，最重要都係氣勢同有型。

連結式天守例子好多，例如九州最有名嘅熊本城亦係其一。

🏯④ 連立式

連立式天守係眾多天守建築入面結構最複雜，防禦能力最高，氣勢最強嘅一種。通常都設有大、小天守，以及眾多付櫓，並以渡櫓、多聞櫓、或者櫓門連成一圈，當中可以喺建築物之間互通，不但防禦力強，而且規格、氣勢都十足，可以話集霸氣同實用於一身。

連立式天守嘅多座建築物連結後會造型中間出現一個中庭位置，依部份有別於本、二、三丸，被稱為天守曲輪。而天守嘅出入口往往只會設喺中庭內，換句話說，即係被四周嘅天守建築群包圍；如果要攻入天守內部的話就會喺最後一段路上被困於中庭交叉火力圍攻，係最堅固嘅一種天守設計。

世界遺產姬路城天守就正係連立式，以完整度之高作為其代表作；另外十二現存天守中嘅松山城亦係連立式設計、德川御三家嘅和歌山城天守則係復興天守中嘅代表。但連立式天守喺眾多天守入面並唔常見。

講咗咁多座天守，你又最鍾意邊座? 有冇邊種建築風格最得你歡心? 又有冇邊座天守想知道更多? 歡迎留言討論，或者IG、FB Inbox我地，睇吓下次又會唔會再詳細講你嘅心頭好啦！

📷-本篇文章內所有相片均為本人攝影作品，如果想借用請知會本人。謝謝-📷

有冇咩關於城嘅想知? 又有冇咩城特別有興趣? 歡迎喺FACEBOOK、IG、BLOGGER度大家一齊討論下。🏯🏯🏯

🗾如果覺得寫/影得唔錯嘅，不如去FACEBOOK同IG比個FOLLOW比個LIKE。你嘅支持係我繼續創作嘅動力。